Elena Sadiku nominohet për çmimin e trajneres më të mirë te Topi i Artë

Trajnerja e klubit suedez BK Häcken, Elena Sadiku, me prejardhje nga Kosova, është nominuar për çmimin prestigjioz të trajnerit më të mirë të vitit në futbollin e femrave për çmimet Topi i Artë 2026. Në moshën 32-vjeçare, ajo është bërë trajnerja më e re e nominuar ndonjëherë në këtë kategori pas triumfit në Kupën Evropiane të Femrave.

Udhëtimi i Sadikut drejt majave të sportit evropian vjen pas një karriere të vështirë si futbolliste, e cila i përfundoi në moshën 24-vjeçare. Teksa ishte 19 vjeç, ajo pësoi dëmtimin e parë të ligamentit të gjurit dhe iu nënshtrua gjithsej 13 operacioneve në gjurin e majtë. Pas ndërhyrjes së tretë, mjekët shqyrtuan edhe amputimin e këmbës për shkak të një infeksioni të rëndë. Prindërit e saj ishin larguar nga Kosova në fillim të viteve '90 drejt Gjermanisë ku ajo lindi, ndërsa pas kthimit të përkohshëm në Kosovë, lufta e detyroi familjen të shpërngulej përfundimisht në Suedi. Katër muaj pas tërheqjes nga loja aktive, klubi Hammarby i dha mundësinë të krijonte një akademi për vajza, duke nisur punën si trajnere që e çoi atë në Kinë, Danimarkë, te Celticu në Skoci ku fitoi titullin kampion, e më pas te BK Häcken.

Lajmin për futjen në listën e ngushtë drejtuesja teknike e mori papritur në korridorin e klubit suedez kur ndihmësja e saj i tregoi logon e ceremonisë në telefon. Nën drejtimin e Sadikut, BK Häcken arriti të fitonte trofeun e parë ndërkombëtar që nga themelimi i klubit në vitin 1970, duke triumpfuar në edicionin inaugurues të UEFA Women’s Europa Cup. Përveç saj, në garë për futbollin e femrave janë edhe trajnerët Andrée Jeglertz i Manchester Cityt, Pere Romeu i Barcelonës, Jonatan Giráldez i Lyonit si dhe Nils Nielsen që udhëheq përfaqësuesen e Japonisë. Te kategoria e meshkujve kërkojnë çmimin Mikel Arteta, Luis de la Fuente, Unai Emery, Vincent Kompany dhe Luis Enrique. Në kategorinë e lojtares më të mirë të re është nominuar edhe Felicia Schröder, e cila u transferua nga BK Häcken te Real Madridi.

Fituesit e çmimeve prestigjioze pritet të shpallen zyrtarisht të hënën, më 26 tetor 2026, kur do të zbardhen emrat e laureatëve të të gjitha kategorive.

Lidhur me përvojën e saj dhe situatën në sport, Sadiku ka theksuar nevojën e mbështetjes institucionale për gratë në futboll, me fokus te të drejtat që lidhen me pushimin e lehonisë dhe rikthimin në punë pas lindjes. Për nominimin e trajnerit tjetër suedez Andrée Jeglertz, përshkrimi zyrtar nënvizon se ai solli mbi dy dekada përvojë në nivel të lartë dhe udhëhoqi me një filozofi diskrete e empatike duke dëgjuar ekipin. Po ashtu, vlerësimi zyrtar për Sadikun e cilëson atë si një trajnere shumë të vlerësuar e cila bën diferencën në fushë.