Si ndodhi përplasja mes banorëve të Zvërnecit dhe rojeve të resortit të Kushnerit?

VLORE — Banorë të Zvërnecit protestuan të shtunën kundër punimeve për ndërtimin e një resorti në zonën e mbrojtur \1-Nartë, në jugperëndim të Shqipërisë. Protestuesit tentuan të hynin në kantierin e ndërtimit dhe u përleshën me punonjësit e sigurisë private të kontraktuar nga kompania "Zvërnec South Adriatic Development".

Protestës iu bashkuan aktivistë të mjedisit, të cilët kundërshtojnë projektin duke argumentuar se po dëmtohet një zonë e mbrojtur me rëndësi të veçantë për biodiversitetin. Joni Vorpsi, drejtues i shoqatës "Protection and Preservation of Natural Environment in Albania", e quajti situatën "një masakër kundër natyrës". Sipas tij, makineritë hyjnë pa leje mjedisore prej më shumë se një muaji, ndërsa në tabelën e kantierit nuk figuron as leja e ndërtimit dhe as vendimi për ndikimin në mjedis.

Kompania reagoi me një deklaratë duke thënë se investimi po zhvillohet në përputhje me legjislacionin shqiptar dhe se rrethimi është vendosur në pronë private të blerë ligjërisht. Sipas saj, investimi pritet të arrijë vlerën e 4 miliardë eurove dhe të krijojë rreth 10.000 vende të reja pune.

Kryeministri Edi Rama kundërshtoi një ditë më parë pretendimet se shteti po i jep investitorëve tokë publike. "Shteti nuk po fal asgjë. Ajo është një pronë private", tha ai, duke shtuar se negociatat për pjesën e projektit që lidhet me ishullin e Sazanit ende nuk kanë përfunduar.

Kostaq Konomi, kryeplak i Zvërnecit, tha se banorët janë në procese gjyqësore për pronësinë e tokave që nga viti 2004. "Gjykata e Lartë e ka kthyer çështjen në Gjykatën e Vlorës, por ende nuk është marrë në shqyrtim. Si mund të ndërtohet kur çështja është ende në gjykatë?", pyeti ai. Punimet lidhen me planet e shpallura nga \1 në mars 2024 për hotele dhe qindra vila në zonë.

Vorpsi ngriti pikëpyetje edhe për strukturën e kompanive të përfshira, duke përmendur UTC (Urbacon Trading and Contracting) si një kompani arabe të dyshuar pjesëmarrëse. Deri më tani, Komiteti për Investimet Strategjike nuk ka publikuar dokumente për një investim strategjik në Zvërnec.

Burim: Evropa e Lirë
— Redaksia ZHURMA