Banka e Shqipërisë mban interesin e lekut në 2.5%
Guvernatori Gent Sejko paralajmëroi se rritja e çmimit të naftës në tregjet ndërkombëtare rrezikon rritjen e inflacionit dhe ngadalësimin ekonomik.
TIRANË — Banka e Shqipërisë ka vendosur të mbajë të pandryshuar normën bazë të interesit për lekun në nivelin 2.5 për qind. Ky vendim i politikës monetare u bë publik nga guvernatori Gent Sejko gjatë një konference për media të mërkurën, ku u analizua ecuria e çmimeve dhe ndikimi i tyre në ekonominë vendase.
Sipas Sejkos, pasiguria në tregje mbetet e lartë dhe balanca e rreziqeve është rritur. Guvernatori paralajmëroi se rritja e çmimit të naftës në tregjet ndërkombëtare mund të çojë në tejkalim të objektivit për inflacionin, si dhe në një ngadalësim të rritjes ekonomike shqiptare në periudhën e ardhshme.
Banka e Shqipërisë sqaroi se parashikimet aktuale bazohen në pritshmëritë për një përfundim të shpejtë të luftës, çka dikton edhe ruajtjen e politikës monetare të deritanishme.
Burim: Gazeta Tema
— Redaksia ZHURMA
