Si do të ndryshojë financimi i spitaleve sipas Bankës Botërore?

TIRANË — Banka Botërore rekomandon një ndryshim themelor në financimin e shërbimeve shëndetësore në Shqipëri: Fondi i Sigurimit të Detyrueshëm të Kujdesit Shëndetësor (FSDKSH) duhet të kalojë nga administrimi i buxheteve historike në një sistem ku pagesat lidhen me rezultatet, cilësinë dhe performancën e ofruesve.

Sipas raportit, Fondi administron rreth 67% të shpenzimeve publike për shëndetësinë, por funksionon kryesisht si administrator buxheti. Financimi i spitaleve publike bazohet në buxhete historike sipas zërave të shpenzimeve, dhe si rezultat lidhet pak me aktivitetin ose rezultatet e arritura.

Banka Botërore thekson se modeli aktual u jep ofruesve pak stimuj për të rritur produktivitetin, për të racionalizuar shërbimet, ose për t'i zhvendosur trajtimet drejt formave me kosto më të ulët. Problemi, sipas raportit, nuk lidhet me fragmentimin e fondeve, por me mungesën e kapaciteteve për blerje strategjike të shërbimeve.

Për kujdesin parësor, raporti propozon pagesa të bazuara në kapitacion, të përshtatura sipas moshës dhe rrezikut të pacientëve, me fonde të dedikuara për diagnostikën laboratorike e instrumentale dhe tregues performance, aty ku është e mundur.

Për shërbimet ambulatore të specializuara, Banka Botërore rekomandon që ofruesit publikë të kontraktohen në mënyrë strategjike, me pagesa të rregulluara ngjashëm me ato të PPP-ve dhe ofruesve privatë, por të kufizuara me kuota e tavane buxhetore për të shmangur zgjerimin e panevojshëm të shërbimeve.

Në nivel spitalor, raporti propozon kontraktim selektiv dhe financim të bazuar në volum ose kritere të caktuara, në përputhje me Planin Kombëtar të Spitaleve 2023-2030, me kalim gradual drejt financimit sipas rasteve ose paketave të shërbimeve. Banka Botërore e cilëson kalimin e Fondit nga administrator pasiv buxheti në blerës aktiv si hap kyç për performancën e sistemit shëndetësor shqiptar.

Burim: Gazeta Tema
— Redaksia ZHURMA