Bajrami i shkruan Sorensenit për varrezat masive në Zubin Potok
Katër mbetje mortore u gjetën të hënën në Jabukë; një lokacion tjetër i dyshuar u zbulua javën e kaluar në Kalludër.
PRISHTINË — Kryenegociatori i Kosovës për dialogun me Serbinë, Agron Bajrami, i ka shkruar të dërguarit të BE-së për dialogun, Peter Sorensen, pas zbulimit të dy lokacioneve në Zubin Potok ku dyshohet për varrezë masive të të vrarëve gjatë luftës.
Në letër, Bajrami kërkon që Bashkimi Evropian të sigurojë që Serbia t'i zbatojë plotësisht zotimet e saj në kuadër të Deklaratës për Personat e Zhdukur, përfshirë qasje të pakufizuar në arkiva dhe mbrojtje për të gjithë ata që ofrojnë informacione.
"Familjet kanë pritur shumë gjatë për të vërtetën", ka shkruar ai në X, ku i ka përcjellë Sorensenit edhe shqetësimet e thella lidhur me zhvillimet e fundit sa i përket personave të zhdukur nga lufta e viteve 1998–1999.
Të hënën janë gjetur katër mbetje mortore nga gërmimet në Jabukë të Zubin Potokut, ku dyshohet për varrezë masive të trupave të vrarë gjatë luftës në Kosovë nga forcat serbe. Javën e kaluar u zbulua edhe një lokacion tjetër i dyshuar në Kalludër të Zubin Potokut.
Burim: Demokracia
— Redaksia ZHURMA
