Krasniqi: Institucionet janë mbushur me kushërinj, dajë e teze

Ish-deputetja e LDK-së, Rrezarta Krasniqi, ka akuzuar pushtetin e udhëhequr nga Albin Kurti për nepotizëm në institucionet shtetërore dhe ambasadat e Kosovës, duke përmendur premtimet e bëra gjatë fushatës zgjedhore të vitit 2021 për meritokraci dhe transparencë. Ajo ka reaguar ndaj kritikave që i bëhen për qëndrimet e saj, duke vënë në pikëpyetje heshtjen ndaj punësimit të afërmve në sektorin publik.

Krasniqi ka kujtuar premtimet e mëparshme se ministritë dhe ambasadat nuk do të mbusheshin me familjarë, ndërsa tashmë institucionet janë mbushur me kushërinj, dajë, teze, halla, balldëska e baxhanakë. Sipas saj, shteti është shndërruar në çiflig dhe se në kushte normale mbështetësit do të duhet të reagonin ndaj kësaj situate.