Musliu-Shoshi kritikon punësimet familjare në ministrinë e drejtuar nga Konjufca

Deputetja e Partisë Demokratike të Kosovës, Ariana Musliu-Shoshi, ka ngritur kritika të ashpra lidhur me punësimet e fundit në Ministrinë e Punëve të Jashtme dhe Diasporës, duke i cilësuar ato si të lidhura me familjarë të politikanëve të ndryshëm. Duke u drejtuar drejtpërdrejt, ajo i ka kërkuar ministrit Glauk Konjufca që «ndale dorën me nipa e mbesa», ndërsa ka shpërndarë shkrime mediatike që trajtojnë lidhjet familjare të personave të punësuar me aktorë të skenës politike.

Sipas saj, ambasadat e Kosovës nuk duhet të shërbehen si hapësira për rehati familjare e partiake. Musliu-Shoshi ka theksuar se procesi i emërimeve në diplomaci duhet të mbështetet rreptësisht te merita, profesionalizmi dhe kriteret ligjore, duke shmangur çdo lidhje familjare me zyrtarët në pushtet, pasi diplomacia i detyrohet interesave të shtetit dhe jo atyre personale apo të grupeve politike.