Baba dhe dy djemtë e tij përfundojnë në Polici për dhunë në familje në Podujevë
Përplasja filloi mes babait dhe djalit të tij, M.K. (20 vjeç); vëllai i mitur, E.K., tentoi t'i ndante, por dyshohet se u përfshi edhe vetë në incident.
PODUJEVË — Një konflikt brenda familjes në fshatin Llapashticë e Epërme të Podujevës përfundoi me babain dhe dy djemtë e tij në Polici, pasi mosmarrëveshja mes S.K. (53 vjeç) dhe djalit të tij M.K. (20 vjeç) eskaloi në përleshje fizike, me të dy të dyshuar se e kanë goditur njëri-tjetrin me grushte.
Vëllai i mitur, E.K. (16 vjeç), kishte tentuar t'i ndante, por sipas Policisë, edhe ai dyshohet se u përfshi në incident duke sulmuar vëllain e tij. Për rastin u njoftuan Prokurori Kujdestar për Dhunë në Familje dhe Prokurori për të Mitur, të cilët urdhëruan inicimin e procedurës për veprën penale 'Dhunë në familje'.
Pas intervistimit, të tre të dyshuarit u liruan në procedurë të rregullt, ndërsa hetimet lidhur me rastin vazhdojnë. Personat e përmendur prezumohen të pafajshëm derisa fajësia e tyre të mos provohet me vendim të formës së prerë nga gjykata.
Burim: Sinjali
— Redaksia ZHURMA