Azemi: Punëtorët teknikë nuk kthehen në punë pa pagat e korrikut dhe gushtit
Greva e punëtorëve teknikë në Prishtinë do të vazhdojë derisa të paguhen pagat e prapambetura dhe të zbatohet paga prej 500 eurosh.
Redaksia ZHURMA · · 1 min lexim
Kryetari i Sindikatës së Punëtorëve Teknikë, Jusuf Azemi, ka bërë të ditur se greva në Prishtinë do të vazhdojë derisa punëtorëve t'u paguhen pagat e prapambetura. Gjatë një paraqitjeje, ai tha se punëtorët po përballen me presion për t'u kthyer në shkolla.
“Pa i paguar komplet muajin gusht dhe ditët e muajit korrik, ne nuk do t'i kthehemi punës”, u shpreh Azemi. Ai shtoi se sindikata është tërhequr nga marrëveshja e mëhershme me DKA-në, duke e akuzuar për mosrespektim të saj, dhe kërkoi që punëtorëve t'u garantohet paga prej 500 eurosh.
Sipas tij, nuk do të ketë më bisedime me institucionet derisa të shlyhen pagat e korrikut e gushtit dhe të zbatohet paga e kërkuar.
