Avokatja e Arlinda Zekajt akuzon institucionet për vrasjen e saj

Avokatja Adelina Hoxha, e cila përfaqësonte të ndjerën Arlinda Zekaj në rastet e dhunës në familje dhe përplasjes për djalin e saj të mitur, ka akuzuar drejtpërdrejt institucionet shtetërore pas vrasjes së viktimës në Vitomiricë të Pejës. Hoxha deklaroi se përgjegjësia nuk i mbetet vetëm autorit të dyshuar, pasi sipas saj prokurorja nuk e ka ushtruar detyrën e vet zyrtare.

Ngjarja vjen pasi e ndjera Arlinda Zekaj i kishte drejtuar një letër Prokurorisë Themelore në Pejë më 22 tetor, vetëm tri ditë para se të gjendej e vrarë. Në atë shkresë, viktima kërkonte ndërhyrje urgjente nga organet kompetente për shkak të shqetësimeve për sigurinë e saj personale dhe frikës për jetën. Avokatja kishte bërë me dije se e ndjera përjetonte dëshpërim të madh nga ndarja me fëmijën e saj.

Përpara se të ndodhte vrasja, avokatja Hoxha kishte dorëzuar një ankesë disiplinore prej 14 faqesh te Kryeprokurorja e Prokurorisë Themelore në Pejë. Në këtë dokument kërkohej hetim ndaj prokurores së rastit për pakujdesi të rëndë profesionale, mosushtrim efektiv të detyrës dhe dështim në mbrojtjen e interesit të fëmijës së mitur. Ankesa ngrihte shqetësime mbi procedurën e intervistimit të të miturit, ndikimin e mundshëm në deklaratën e tij dhe vonesat në marrjen e provave kryesore, përfshirë pamjet e kamerave të sigurisë.

Hoxha theksoi gjithashtu se kishte kërkuar verifikim të komunikimeve mes prokurores dhe hetuesve policorë për të sqaruar të gjitha rrethanat e trajtimit të kërkesave për ndihmë.

«Mundem me thanë shkurt që shteti e ka vra. Prokurorja s’e ka ushtru detyrën e vet», ka deklaruar avokatja Adelina Hoxha. Në një reagim tjetër publik pas ngjarjes, ajo shtoi: «Por jo, Arlindën e vrau shteti».