AUV: Tërhiqet nga tregu mishi i bluar i kompanisë AJH FOODS

Agjencia e Ushqimit dhe Veterinarisë ka urdhëruar tërheqjen nga tregu të produktit «Mish i bluar gjedhi» të kompanisë AJH FOODS SH.P.K. nga Novobërda, pasi analizat laboratorike konfirmuan praninë e ADN-së së pulës në këtë produkt. Për më tepër, institucioni ka ndaluar përkohësisht prodhimin e mëtutjeshëm të këtij operatori ekonomik në pronësi të Jusuf Hasani, derisa të përfundojnë të gjitha verifikimet e nevojshme mbi përbërjen e lëndëve të para.

Gjatë kontrolleve zyrtare për sigurinë, cilësinë dhe autenticitetin e produkteve ushqimore, inspektorët e Agjencisë së Ushqimit dhe Veterinarisë identifikuan se produkti në fjalë shitej ndërkohë që në etiketimin e dokumentuar gjatë inspektimeve deklaroheshin vetëm mish gjedhi dhe yndyrë. Kjo mospërputhje mes përbërjes faktike dhe deklarimit shtroi dyshime serioze për përdorimin e përbërësve të padeklaruar me origjinë nga pula, ndërsa rezultatet laboratorike zyrtare u realizuan në laboratorin ALIMENTI-OMNILAB në Bullgari.

Sipas njoftimit të Agjencisë së Ushqimit dhe Veterinarisë, inspektorët e terrenit evidentuan dokumentacion furnizimi për rreth 2.2 tonë mish pule të ndarë mekanikisht, krahas furnizimeve shtesë me mish pule dhe mish gjedhi. Si rezultat i raportit të inspektimit, autoritetet njoftuan se janë kthyer dhe izoluar në depon frigoriferike 77 kilogramë mish i bluar, ndërsa për lotin e analizuar fillimisht nuk është evidentuar ndonjë kthim i produktit në depon e operatorit ekonomik.

Në përputhje me procedurat ligjore, operatori ekonomik ka kërkuar realizimin e një analize paralele për verifikimin e rezultateve laboratorike të dërguara nga jashtë vendit. Agjencia e Ushqimit dhe Veterinarisë bëri të ditur se do ta trajtojë këtë kërkesë duke respektuar të drejtat e palës, por theksoi se masat e deritanishme mbeten parandaluese dhe nuk paragjykojnë përfundimet e procedurës së kontrollit zyrtar apo të analizës paralele.

Në fazën vijuese të inspektimit, autoritetet do të përqendrojnë kontrollet në verifikimin e origjinës së saktë të ADN-së së pulës, përdorimit eventual të mishit të ndarë mekanikisht, si dhe përputhshmërisë së përbërjes faktike me deklarimin në etiketë. Gjithashtu, sipas agjencisë, do të verifikohet nëse operatori ka respektuar kushtet e parapara ligjore për aprovimin dhe përdorimin e mishit të ndarë mekanikisht në produktet përfundimtare të mishit, duke përfshirë kërkesat e rrepta për higjienën, përpunimin, ruajtjen dhe kontrollin mikrobiologjik.

Duke iu referuar dispozitave të Ligjit nr. 08/L-120 për Ushqim, institucioni kujtoi se operatorët ekonomikë mbajnë detyrimin ligjor të sigurojnë që produktet e vendosura në treg të përmbushin kërkesat e sigurisë ushqimore dhe që informacioni për përbërjen e tyre të mos i çorientojë konsumatorët. «Konsumatorët kanë të drejtë të dinë saktësisht çfarë mishi përmban produkti që blejnë», theksohet në njoftimin e Agjencisë së Ushqimit dhe Veterinarisë, e cila premtoi se do të ndërmarrë masat e mëtejshme administrative bazuar te gjurmueshmëria e lëndëve të para.