AUV ndalon importin e misrit dhe shitjen e ushqimit për viça

Agjencia e Ushqimit dhe Veterinarisë ka ndërmarrë masa pas kontrolleve kufitare dhe inspektimeve në tregun e brendshëm, ku u konstatua prania e aflatoksinave mbi kufijtë e lejuar në produkte të kompanisë MONUNI SH.P.K. nga Gjilani. Gjatë kontrollit kufitar të një ngarkese prej 25,120 kilogramësh misër merkantil, analizat laboratorike të AUV-së zbuluan aflatoksinë B1 në nivel prej 30 µg/kg, ndërsa analizat e Institutit Kombëtar të Shëndetësisë Publike të Kosovës konfirmuan aflatoksina totale prej 47 µg/kg, mbi vlerën referente prej 10 µg/kg.

Inspektorati Fitosanitar i AUV-së vendosi refuzimin e importit dhe kthimin e ngarkesës në vendin e origjinës. Ndërkohë, gjërat u diktuan më tej gjatë inspektimeve në tregun e brendshëm, ku analizat laboratorike shfaqën nivel mbi kufirin e lejuar të aflatoksinës B1 edhe në produktin e quajtur “Ushqim për viça deri 300 kg”. Për këtë arsye, Inspektorati ndaloi shitjen dhe urdhëroi tërheqjen e këtij produkti nga qarkullimi.

Institucioni sqaroi se aflatoksina B1 është një substancë toksike e prodhuar nga myqe të ndryshme, e cila mund të shkaktojë dëmtime të mëlçisë dhe të rrisë rrezikun e kancerit nga ekspozimi afatgjatë. Tek kafshët qumështore ajo mund të kalojë në qumësht si aflatoksinë M1, duke rrezikuar sigurinë ushqimore. Autoritetet bënë të ditur se do të vazhdojnë kontrollet për të mbrojtur shëndetin e njerëzve dhe kafshëve.