Atletico Madridi interesohet për Leon Avdullahun nga Hoffenheimi

Atletico Madridi ka shfaqur interesim për transferimin e mesfushorit të Kombëtares së Kosovës, Leon Avdullahu, nga skuadra e Hoffenheimit gjatë verës së vitit të ardhshëm. Trajneri Diego Simeone u ka kërkuar drejtuesve të klubit të La Ligës që të nisin negociatat për lojtarin 22-vjeçar, i cili ka kontratë me klubin gjerman deri në vitin 2031.

Mesfushori kosovar vazhdon të tregojë paraqitje të larta në kampionatin gjerman. Siç raportoi Zhurma më 26 tetor 2026, Leon Avdullahu u përfshi në 11-shen e javës në Bundesligë pas fitores së skuadrës së tij ndaj Leverkusenit, i vlerësuar nga revista “Kicker”.

Sipas raportimeve nga sajti gjerman i specializuar për transferime “Fussballtransfers”, madrilenët po planifikojnë të përforcojnë mesfushën defanzive me një futbollist që ka aftësi për ta lexuar lojën dhe për të përballuar presionin. Gjatë afatit kalimtar të verës, edhe disa skuadra të tjera spanjolle patën shprehur interesim për shërbimet e tij. Megjithatë, Hoffenheimi nuk e lejoi largimin e lojtarit, duke vendosur ta mbante të paktën edhe për një vit. Klubi gjerman e konsideron atë një pjesë shumë të rëndësishme të ekipit, pasi e bleu nga Baseli në vitin 2025 për tetë milionë euro. Që nga kalimi i tij te gjermanët, mesfushori ka zhvilluar 48 ndeshje zyrtare ku ka shënuar një gol dhe ka dhënë një asistim, ndërsa në sezonin aktual ka realizuar 1 gol në 13 paraqitje në të gjitha garat. Veç tij, në listën e skuadrës spanjolle për këtë pozitë ndodhen edhe Stefan Dzodic dhe Mikel Merino.

Sipas mediumit gjerman, trajneri Diego Simeone u ka kërkuar drejtpërdrejt drejtuesve të Atletico Madridit që të hapin bisedimet zyrtare me Hoffenheimin për realizimin e kalimit të futbollistit në La Liga.