ATK mbledh mbi 908 milionë euro të hyra tatimore për nëntë muaj

Administrata Tatimore e Kosovës ka arritur të arkëtojë 908.8 milionë euro gjatë periudhës janar-shtator, duke shënuar një rritje prej 114.5 milionë eurosh krahasuar me periudhën e njëjtë të vitit paraprak. Ky bilanc përfaqëson një ngritje prej 14.4 për qind në të hyrat tatimore.

Krahas rritjes së arkëtimeve, institucioni ka evidentuar edhe një ulje prej 22 për qind në numrin e ndëshkimeve. Këta tregues lidhen me përpjekjet e ATK-së për të rritur përmbushjen e obligimeve tatimore dhe për të përmirësuar efikasitetin në administrimin e tatimeve.

Sipas njoftimit, rezultatet mbështeten nga monitorimi i bizneseve, me theks të veçantë te tatimpaguesit me rrezik të lartë tatimor, si dhe nga edukimi i tatimpaguesve dhe digjitalizimi i shërbimeve, që synon të lehtësojë procedurat.