ASK: Bie numri i fluturimeve në Kosovë, shtohen përdoruesit e telefonave

PRISHTINË — Agjencia e Statistikave të Kosovës (ASK) ka publikuar sot raportin e ri për Statistikat e Transportit dhe Telekomunikimit për muajin prill të vitit 2026. Ky dokument zyrtar pasqyron të dhënat e fundit mujore mbi ndryshimet në transportin ajror, atë hekurudhor dhe në sektorin e telekomunikimit.

Sipas raportit të ASK-së, sektori i transportit ajror ka shënuar tkurrje krahasuar me vitin e kaluar. Gjatë muajit prill të vitit 2026 janë realizuar gjithsej 1.106 fluturime në vend, çka paraqet një rënie prej 5.1 për qind në krahasim me të njëjtën periudhë të vitit paraprak.

Një rënie e ngjashme është shënuar edhe në numrin e udhëtarëve ajrorë. Në total janë regjistruar 368.053 udhëtarë, që përbën një ulje prej 7.8 për qind krahasuar me prillin e vitit 2025. Nga ana tjetër, transporti hekurudhor pati një rritje të udhëtarëve për 3.3 për qind, duke arritur në 8.309.

Megjithatë, për këtë periudhë nuk është regjistruar asnjë transport i mallrave në hekurudha. Në sektorin e telekomunikimit, telefonia fikse shënoi një rritje të lehtë të përdoruesve me 0.6 për qind krahasuar me vitin paraprak, duke shkuar në 69.695 përdorues në tërësi.

Kurse trafiku i realizuar në telefoninë fikse shënoi rënie të ndjeshme prej 13.9 për qind, duke arritur në 1.660.635 minuta. Në telefoninë mobile, numri i përdoruesve me parapagim arriti në 1.495.899 (rritje 0.80 për qind), ndërsa përdoruesit me kontratë u rritën në 320.697 (rritje 1.86 për qind).

Sipas përmbledhjes së ASK-së, ky sektor i telekomunikimit vazhdon të ketë një rritje të qëndrueshme të përdoruesve, për dallim nga sektori i transportit ajror në Kosovë që po shënon tkurrje.

Burim: Albinfo.ch, https://www.albinfo.ch/kosove-bie-numri-i-fluturimeve-rritet-ai-i-perdoruesve-te-telefoneve/
— Redaksia ZHURMA