Asamblistë nga Shtimja dhe Fushë Kosova i bashkohen protestës së PDK-së para Qeverisë

Deputetëve të Partisë Demokratike të Kosovës, që po zhvillojnë aksionin e bllokimit të hyrjes së Qeverisë në shenjë proteste për mosvazhdimin e seancës konstituive të Kuvendit, këtë të enjte u janë bashkuar asamblistë dhe aktivistë të PDK-së nga komunat e Shtimes dhe Fushë Kosovës.

Aksioni vazhdon tash e disa ditë para objektit të Qeverisë, me kërkesën për zhbllokimin e procesit të konstituimit të Kuvendit dhe krijimin e institucioneve të reja. PDK-ja po kërkon nga kryeministri në detyrë që të vazhdojë me propozimin për kryeparlamentar/e, rrjedhimisht me konstituimin e Kuvendit.

Një ditë më parë, PDK-ja ka dorëzuar kallëzim penal ndaj Albin Kurtit dhe anëtarëve të Qeverisë në dorëheqje për mbajtjen e pozitave të dyfishta.