Artistët e Sunny Hill mbërrijnë sot në Prishtinë
Organizatori Fat Gjakova thotë se skenat po përfundohen dhe të gjithë artistët do të kenë mbërritur deri nesër.
PRISHTINË — Festivali “Sunny Hill” nis të premten në Prishtinë, ndërsa organizatorët thonë se përgatitjet po ecin sipas planit. “Gjithçka po shkon sipas planit, këto ditë veçse janë duke përfunduar të gjitha skenat, produksioni ka filluar që një-dy javë, jemi shumë afër, mezi po presim mu bë e premte”, tha organizatori Fat Gjakova në emisionin “Ora Shtatë” të Klan Kosovës.
Sipas Gjakovës, skenat e festivalit janë në fazën e fundit të përgatitjes, ndërsa procesi i produksionit ka nisur para një deri në dy javësh. Organizatorët presin mijëra adhurues të muzikës nga vende të ndryshme të botës për fundjavën më të madhe muzikore të vitit në kryeqytet.
Ardhja e artistëve në Kosovë fillon sot, tha Gjakova, ndërsa deri nesër pritet të kenë mbërritur të gjithë pjesëmarrësit e festivalit. Sunny Hill mbetet një nga ngjarjet më të pritura të verës në Prishtinë.
Burim: Lajmi.net
— Redaksia ZHURMA