Prokuroria e Fierit mbyll hetimet, dërgon në gjyq personin me arsenal armësh

FIER — Prokuroria pranë Gjykatës së Shkallës së Parë të Juridiksionit të Përgjithshëm Fier përfundoi hetimet për procedimin penal nr. 1586 të vitit 2025 dhe dërgoi në gjyq shtetasin M.R., i akuzuar për veprën penale "Mbajtja pa leje dhe prodhimi i armëve, armëve shpërthyese dhe i municionit", parashikuar nga neni 278, paragrafi 6 i Kodit Penal.

Sipas hetimeve, i pandehuri M.R. mbante në automjetin që drejtonte një armë zjarri tip pistoletë, së bashku me 50 fishekë. Në vijim të veprimeve hetimore dhe kontrolleve në mjediset e përdorura prej tij, u sekuestruan edhe 12 armë të tjera zjarri.

Nga këto, 10 janë automatikë model 56, 1 armë automatike e tipit "Skorpion" dhe 1 pistoletë — të gjitha, sipas ekspertimit teknik-balistik, në gjendje funksionale dhe të afta për qitje. Së bashku me pistoletën e gjetur në makinë, numri i armëve të zbuluara arrin në 13.

Gjatë kontrolleve u sekuestruan edhe 465 fishekë luftarakë të kalibrave të ndryshëm, 14 krehëra armësh për automatikë, pushkë dhe pistoleta, si dhe 2 pajisje për zbutjen e zhurmës së armëve, të njohura si silenciatorë. Edhe këto rezultuan në gjendje të rregullt teknike.

Hetimet evidentuan gjithashtu të dhëna që krijojnë dyshime se një pjesë e armëve mbahej me qëllim shitjen e tyre në mënyrë të paligjshme. Këto fakte janë objekt i një procedimi penal të ndarë, të hapur veçmas nga Prokuroria e Fierit.

Prokuroria e Fierit thotë se mbetet e angazhuar në goditjen e çdo forme kriminaliteti që cenon rendin dhe sigurinë publike, veçanërisht të veprave penale të armëmbajtjes pa leje, prodhimit dhe tregtimit të paligjshëm të armëve e municioneve.

Në bashkëpunim të ngushtë me Policinë e Shtetit dhe institucionet e tjera ligjzbatuese, Prokuroria do të vijojë të ushtrojë me vendosmëri kompetencat e saj kushtetuese e ligjore, me qëllim garantimin e rendit publik, rritjen e sigurisë së qytetarëve dhe forcimin e besimit të publikut te drejtësia.

Burim: BalkanWeb
— Redaksia ZHURMA