Maqedonia nënshkruan marrëveshjen One Stop me Shqipërinë

SHKUP — Ministria e Punëve të Brendshme e Maqedonisë ka nënshkruar Marrëveshjen me Republikën e Shqipërisë për vendosjen e sistemit të kontrollit të përbashkët kufitar "One Stop". Marrëveshja mbyll procesin e vendosjes së këtij sistemi me të gjithë fqinjët e Maqedonisë që nuk janë pjesë e zonës Shengen, njofton MPB.

Sistemi One Stop u mundëson qytetarëve një ndalesë të vetme dhe një kontroll të vetëm kufitar, me kohë pritjeje dukshëm më të shkurtër. Shtetet, nga ana tjetër, përfitojnë menaxhim më efikas të kufijve, siguri më të madhe, më shumë tregti, turizëm dhe ndërlidhje rajonale, thuhet në njoftimin e MPB-së.

Në pikën kufitare të Tabanocit, koha e pritjes është ulur ndjeshëm edhe pse numri i udhëtarëve këtë verë u rrit me 15 deri në 20 për qind. Të njëjtin efekt e ka sjellë sistemi edhe në Bllacë – Hani i Elezit, ndërsa me Jazhincë – Glloboçicë janë përmbyllur kontrollet e përbashkëta me Kosovën.

Sipas MPB-së, marrëveshja me Shqipërinë është "hapi i radhës me rëndësi" dhe së shpejti sistemi One Stop do të vendoset edhe atje. Kështu, Maqedonia do të bëhet një nga vendet e para në rajon që e zbaton këtë model me të gjithë fqinjët jashtë Shengenit.

Ministria e cilëson sistemin si "investim në komunikim më të shpejtë mes njerëzve, bashkëpunim më të fuqishëm ekonomik, lëvizshmëri më të madhe dhe kufij edhe më të sigurt". Zbatimi i plotë me Shqipërinë ende s'ka datë të konfirmuar.

Burim: Tetova Sot
— Redaksia ZHURMA