Arrestohen dy persona në Suharekë gjatë operacionit policor Shtalla

SUHAREKË — Policia e Kosovës ka arrestuar dy persona në fshatin Maqitevë të Suharekës, gjatë operacionit të koduar «Shtalla», nën dyshimet për kultivim të paautorizuar të kanabisit dhe mbajtje pa leje të armëve. Aksioni u realizua më 26 tetor 2026, rreth orës 06:20, nga Drejtoria për Hetimin e Trafikimit me Narkotikë – Njësia në Prizren, me mbështetjen e Njësisë Speciale Operative dhe forenzikës.

Hetimet për rastin «Shtalla» datojnë nga 16 shtatori 2025 dhe ndërlidhen me dyshimet për kultivimin e bimëve narkotike si dhe posedimin e armëve në këtë zonë. Në kuadër të këtij rasti, më 27 mars 2026 ishte vetëdorëzuar në polici i dyshuari i tretë, Fazli Ndrecaj, i cili që nga ajo kohë ndodhet në masën e paraburgimit.

Në zbatim të urdhërkontrollit të lëshuar nga Gjykata Themelore në Prizren, zyrtarët policorë kanë kryer bastisje në shtëpitë, objektet përcjellëse dhe automjetet e të dyshuarve Miftar Ahmetaj dhe Blerton Ahmetaj. Gjatë këtyre kontrolleve në shtëpinë e tyre, policia gjeti dhe sekuestroi një pushkë gjysmautomatike të njohur si «dhjetëshe», së bashku me shtatë fishekë. Dy të arrestuarit u shoqëruan në zyrat e njësisë hetimore në Prizren, ku u intervistuan në prani të avokatëve të tyre mbrojtës.

Pas intervistimit, me vendim të nxjerrë me shkrim nga Prokurori i Shtetit, ndaj dy të arrestuarve është caktuar masa e ndalimit për 48 orë dhe ata janë dërguar në Qendrën e Ndalimit në Stacionin Policor në Prizren. Hetimet nga njësia kompetente po vazhdojnë për veprat penale që lidhen me kultivimin e kanabisit dhe mbajtjen e paautorizuar të armëve.