Arrestohen babë e bir në Durrës pas vdekjes së 74-vjeçares në autostradë
Xhelal Muka, 65 vjeç, dhe djali Benard, 32 vjeç, u larguan pa i dhënë ndihmë 74-vjeçares, më pas fshehën dhe riparuan automjetin Mercedes Benz.
TIRANË — Xhelal Muka, 65 vjeç nga Durrësi, u arrestua të premten nga Policia e Tiranës, një ditë pasi përplasi për vdekje shtetasen M.T., 74 vjeçe, në autostradën Tiranë-Durrës, rreth orës 04:10 të enjten. Në pranga ra edhe djali i tij, Benard Muka, 32 vjeç, i cili ndodhej pasagjer në automjet.
Sipas policisë, të dy dyshohet të jenë larguar menjëherë nga vendi i aksidentit pa i dhënë ndihmën e parë 74-vjeçares dhe pa njoftuar autoritetet. Specialistët e qarkullimit rrugor identifikuan, lokalizuan dhe kapën më pas autorin e dyshuar, banues në Durrës, me qëllim sqarimin e rrethanave të ngjarjes.
Policia dyshon se 32-vjeçari, i pranishëm në automjet në momentin e aksidentit, fshehu më pas veturën tip Mercedes Benz dhe riparoi dëmet e shkaktuara, me qëllim pengimin e zbulimit të së vërtetës. Mjeti u gjet dhe u sekuestrua si provë materiale nga hetuesit.
Materialet procedurale iu referuan Prokurorisë së Tiranës për veprime të mëtejshme. Që të dy përballen tani me akuza jo vetëm për vetë aksidentin, por edhe për largimin nga vendngjarja dhe përpjekjen për të fshehur provat.
Burim: Euronews Albania
— Redaksia ZHURMA