Si i shërbyen kompanitë tech amerikane Kinës në survejimin masiv që i dha AP Pulitzer?

NEW YORK — The Associated Press fitoi çmimin Pulitzer për Raportim Ndërkombëtar, pas një hetimi trevjeçar që ekspozoi si qeveria kineze ndërtoi njërin ndër sistemet më të avancuara të survejimit masiv — me ndihmën direkte të kompanive teknologjike amerikane.

Bordi i Pulitzer-it vlerësoi pesë gazetarë: Dake Kang, Garance Burke, Byron Tau, Aniruddha Ghosal dhe gazetaren e pavarur Yael Grauer, për atë që u cilësua si "hetim global mahnitës mbi mjetet më të avancuara të survejimit masiv".

Sipas hetimit, të mbështetur në mijëra dokumente dhe intervista të shumta, themelet e sistemit kinez të monitorimit dhe kontrollit të qytetarëve janë ndërtuar ndër vite me ndihmën e kompanive amerikane. Në disa raste, ato madje i kanë promovuar aftësitë survejuese si element marketingu.

Hetimi i AP-së trajtoi gjithashtu zgjerimin e monitorimit të targave të automjeteve në Shtetet e Bashkuara nga U.S. Border Patrol — një dimension vendas brenda një investigimi me shtrirje globale.

Zëvendëspresidentja e lartë dhe kryeredaktorja e AP-së, Julie Pace, deklaroi se ky raportim "kompleks dhe sfidues", i realizuar nga gazetarë në disa kontinente, mishëron frymën e vërtetë të AP-së.

Çmimi vjen në një moment kur fuqia e kompanive të mëdha teknologjike dhe marrëdhënia e tyre gjithnjë e më komplekse me qeveritë është në qendër të vëmendjes globale — një realitet që kërkon gazetarinë investigative si instrument llogaridhënieje.

Burim: ATSH
— Redaksia ZHURMA