Anton Quni dhe Hadërgjonaj mbështesin Sejdiun, Kryesia e LDK-së miraton marrëveshjen
Deputetët e LDK-së shprehen publikisht pro kandidaturës së Bekim Sejdiut, ndërsa Kryesia e partisë miraton marrëveshjen me LVV-në.
Redaksia ZHURMA · · 1 min lexim
Kryesia e Lidhjes Demokratike të Kosovës ka miratuar unanimisht marrëveshjen politike për tejkalimin e krizës institucionale, duke mbështetur edhe nominimin e profesor Bekim Sejdiut për president. Vendimi, i cili u njoftua pas mbledhjes, u mor në përputhje me autorizimet e Kuvendit të partisë dhe procedurat vendimmarrëse.
Në deklaratën e publikuar, LDK-ja thekson se procesi nuk lidhet vetëm me zgjedhjen e një individi, por edhe me ruajtjen e institucioneve dhe shmangien e një krize të re politike. Partia e vlerëson Sejdiun si jurist, profesor universitar, diplomat dhe ish-gjyqtar të Gjykatës Kushtetuese, duke e konsideruar të përshtatshëm për detyrën.
Mbështetje publike për kandidaturën kanë shprehur edhe deputetë të partisë. Anton Quni, para mbledhjes së Grupit Parlamentar, deklaroi se e njeh nga afër familjen Sejdiu dhe se është i bindur se kandidati do ta bëjë krenar tërë kombin e Kosovës. Ndërsa Fadil Hadërgjonaj e cilësoi Sejdiun si personalitet me integritet profesional e kombëtar dhe me përvojë në diplomaci.
Këto zhvillime vijnë pas dakordimit të arritur mes kryetarit të LDK-së, Lumir Abdixhikut, dhe kryetarit të Lëvizjes Vetëvendosje, Albin Kurtit, për kandidatin konsensual.
