Situata në Kosovë stabilizohet pas reshjeve, AME në gatishmëri 24 orë

PRISHTINË — Agjencia e Menaxhimit Emergjent (AME) njoftoi se situata në nivel vendi është stabile, e qetë dhe plotësisht e menaxhueshme pas reshjeve të shiut të ditës së sotme, pasi Drejtoritë për Mbrojtje dhe Shpëtim dhe Njësitë Profesionale të Zjarrfikjes dhe Shpëtimit (NJPZSH) intervenuan me shpejtësi e efikasitet në të gjitha zonat e prekura.

Në Gjakovë e Rahovec, niveli i ujërave është në rënie dhe situata është nën kontroll e drejt stabilizimit. Në Prizren e Suharekë ka pasur raste të depërtimit të ujit në bodrume, objekte banimi dhe lokale afariste, por gjendja tashmë është stabilizuar, sipas AME-së.

Në Prishtinë është evidentuar grumbullim uji në Shkabaj dhe në autostradën Prishtinë–Shkup, afër Marigona Residence, ku ekipet ndërhynë për normalizimin e qarkullimit. Strukturat e AME-së mbeten në angazhim të vazhdueshëm 24/7, në koordinim me Qendrën Operative të MPB-së, Policinë e Kosovës dhe autoritetet komunale.

Sipas parashikimit të Institutit Hidrometeorologjik të Kosovës, i vetmi burim zyrtar në dispozicion, moti pritet të stabilizohet në ditët në vijim; megjithatë AME thotë se mbetet në gatishmëri të plotë për t'iu përgjigjur çdo zhvillimi apo përkeqësimi të mundshëm të situatës.

Burim: RTV21
— Redaksia ZHURMA