Alma Sarelli kandidon për Senatin e Shtetit të Connecticutit

Emigrantja shqiptare Alma Sarelli ka shpallur kandidaturën për Senatin e Shtetit të Connecticutit në Shtetet e Bashkuara të Amerikës, duke synuar të përfaqësojë distriktin e 26-të. Zgjedhjet për Senatin e Shtetit të Connecticutit do të mbahen më 3 nëntor 2026, ndërsa emri i saj do të jetë në fletën e votimit pasi ka siguruar mbështetjen e Partisë Republikane dhe të Partisë së Pavarur të Connecticutit.

Përpara kësaj gare, Sarelli ka ndërtuar një angazhim të gjerë në institucionet lokale dhe jetën qytetare, duke mbajtur postin e anëtares së Takimit Përfaqësues të Qytetit (RTM) në Westport dhe duke shërbyer për katër vjet si presidente e organizatës Neighbors & Newcomers of Westport. Ajo është pjesë e katër komiteteve në qytet, përfshirë mbrojtjen publike, arsimin, parqet e rekreacioni, si dhe planifikimin e zonimin, ndërkohë që është aktivisht e angazhuar edhe në borde të ndryshme të organizatave jofitimprurëse.

Sipas biografisë së publikuar në faqen zyrtare të fushatës, historia e saj familjare lidhet ngushtë me Shqipërinë, pasi babai i saj drejtonte Shoqatën e Pajtimit të Gjaqeve dhe është angazhuar në pajtimin e familjeve të përfshira në gjakmarrje. Sarelli, e cila me origjinë është nga Shkodra ndërsa bashkëshorti i saj është nga Ulqini, ka treguar se kjo përvojë familjare ka ndikuar në qasjen e saj ndaj shërbimit publik, duke prioritetizuar dëgjimin dhe ndërtimin e besimit. Ajo ka përfunduar studimet për menaxhim biznesi në Universitetin e Berkeleyt dhe sot drejton një kompani për organizimin e eventeve bashkë me bashkëshortin e saj, ndërsa ka rritur katër fëmijë.

Ajo ka sqaruar gjithashtu se mbiemri i saj i vërtetë është Shkreli, të cilin e ndryshoi në Sarelli në fillimet e jetës në Amerikë për shkak të vështirësive që amerikanët kishin me shqiptimin, por tani shprehet se ka ardhur koha që njerëzit ta njohin me mbiemrin e vërtetë.