Allegri shpërthen në akuza ndaj Romës dhe arsyeton shkarkimin nga Milani

Trajneri Massimiliano Allegri shpërtheu në akuza pas barazimit 3-3 mes Napolit dhe Romës në stadiumin "Diego Armando Maradona", ku u përjashtua nga zona teknike në minutat shtesë për protesta ndaj arbitrit. Tekniku italian pretendoi se Roma përfitoi vendin në Ligën e Kampionëve sezonin e kaluar, ndërsa ai vetë pagoi faturën e dështimit duke u shkarkuar nga Milani.

Gara e edicionit të kaluar në kampionat u mbyll me Romën dhe Comon të renditura përpara Milanit në tabelën e klasifikimit, duke zënë pozicionet brenda katërshes më të mirë. Kjo e la ekipin kuqezi jashtë garës më prestigjioze evropiane për klube. Vetëm 24 orë pas përfundimit të atij sezoni, drejtuesit e Milanit morën vendimin për shkarkimin e Allegrit nga detyra e trajnerit, ngjarje kjo që solli reagimin e tij të fundit.

Tensioni i teknikut u vu re gjatë gjithë përballjes dramatike në Pulje, ku pas kartonit të kuq të marrë në minutat shtesë, ai nuk arriti të qetësohej as pas vërshëllimës finale. Sipas raportimeve të mediave italiane, përfshirë gazetën "Corriere dello Sport", Allegri u largua i nervozuar drejt hapësirave të brendshme të stadiumit. Po sipas këtyre raportimeve, ai u dëgjua duke u folur me tone të ashpra pjesëtarëve të stafit të Napolit në sallën e konferencave për shtyp. Në këtë ambient ai pretendoi se kualifikimi i u dha në xhep rivalëve kryeqytetas, ndërsa kostoja i ra atij personalisht gjatë periudhës te Milani.

Mbetet për t'u parë nëse trajneri i Romës, Gian Piero Gasperini, do të reagojë ndaj këtyre akuzave të drejtpërdrejta. Të dy teknikët kanë marrëdhënie miqësore me njëri-tjetrin dhe para ndeshjes së të shtunës u përshëndetën ngrohtësisht, çka e bën të hapur mundësinë e një përgjigjeje publike në ditët në vijim.

Gjatë prononcimit të tij të shkurtër për transmetuesin DAZN Italia, Allegri refuzoi të kryente analizën taktike të takimit. Ai u shpreh para kamerave: «Për herë të parë pas 25 vjetësh, nuk jam në gjendje t’ju jap përgjigje të qarta për ndeshjen. Prandaj, më vjen keq, bur ju uroj natën e mirë». Menjëherë pas kësaj deklarate, ai u largua nga hapësira e intervistave.