FEFS forcon lidhjet akademike mes Prishtinës, Tiranës dhe Romës

PRISHTINË — Fakulteti i Edukimit Fizik dhe Sportit ndërmerr hapa drejt zgjerimit të rrjetit të bashkëpunimeve të jashtme, duke synuar hapësira të reja për zhvillimin institucional, hulumtues dhe akademik.

Gjatë një takimi të realizuar me udhëheqjen e menaxhmentit të universiteteve të sportit, nën drejtimin e zëvendësrektorit Arben Kaçurri, si dhe me praninë e profesorit nga Universiteti Foro Italico i Romës, Antonio Tessitore, u shqyrtua rivitalizimi i marrëveshjeve ekzistuese dhe intensifikimi i lidhjeve ndërinstitucionale.

Delegacionet nga kryeqyteti italian dhe ai shqiptar kanë inspektuar nga afër hapësirat e Institutit të Shkencave të Sportit dhe infrastrukturën përcjellëse të fakultetit, me qëllim të shqyrtimit të mundësive për ndërmarrjen e nismave të përbashkëta në fushën e shëndetit, edukimit fizik dhe sportit.

Ky proces synon të ofrojë perspektiva të reja rreth mobilitetit të studentëve dhe stafit, shkëmbimeve akademike dhe hulumtimeve shkencore, duke e pozicionuar institucionin si një hapësirë të hapur për inovacion dhe partneritete ndërkombëtare.