Milot Avdyli shkëlqen në barazimin e Celjes ndaj RB Salzburgut

Futbollisti nga Vushtrria, Milot Avdyli, ka zhvilluar një paraqitje fantastike për Celjen në sfidën e Ligës së Evropës kundër RB Salzburgut, ku skuadra e tij arriti të kthehet nga disavantazhi prej 0-2 në 2-2. Edhe pse pozita e tij natyrale është ajo e sulmuesit të krahut, ai u aktivizua si mbrojtës dhe dha një kontribut të jashtëzakonshëm në të dyja fazat e lojës.

Platforma «SofaScore» e vlerësoi paraqitjen e tij me notën 7.8, që ishte më e larta e ndeshjes dhe madje më e lartë se ajo e golashënuesve Kramer, Kitano dhe Kucys. Gjatë kësaj përballjeje, Avdyli fitoi 10 duele, realizoi dy ndërhyrje dhe rikuperoi topin shtatë herë në zona të ndryshme të fushës.

Forma e tij e lartë pritet t'i shërbejë edhe Përfaqësueses së Kosovës, pasi përzgjedhësi Franco Foda ka bërë të ditur se llogarit në shërbimet e tij, duke e inkuadruar tashmë në tri ndeshjet e Ligës së Kombeve.

Siç raportoi Zhurma më 13 tetor 2026, futbollisti nga Kosova kishte siguruar vend në 11-shen më të mirë të javës në elitën e Sllovenisë pas një goli fitoreje.