Aleanca kërkon sqarime nga Konjufca për vendimin ndaj familjarëve

Aleanca i është drejtuar ministrit të Punëve të Jashtme dhe Diasporës, Glauk Konjufca, përmes një reagimi publik ku ka ngritur dyshime për nepotizëm dhe lidhje familjare e politike në emërimet e fundit në ambasada dhe konsullata. Sipas Aleancës, vendimet për këto emërime mbajnë nënshkrimin e Konjufcës, ndërsa ajo ka kërkuar të dihet nëse është shfuqizuar Vendimi numër 113/2024, i nënshkruar më 23 prill 2024 nga ish-ministrja Donika Gërvalla, i cili ndalonte punësimin e familjarëve të afërt të zyrtarëve dhe diplomatëve në këtë ministri.

Në reagimin e publikuar në faqen zyrtare në Facebook, Aleanca ka kërkuar nga Konjufca përgjigje se kur dhe për çfarë arsyeje është shfuqizuar ky vendim, duke pretenduar gjithashtu se persona të emëruar nuk i përmbushin kriteret dhe procedurat e gradimit diplomatik. Për më tepër, ajo ka paralajmëruar se do të kërkojë llogaridhënie për secilin emërim, duke shtuar se «ndryshimi i parimeve dhe shkelja e ligjit ekzistues është tradhtia më e madhe që mund t’u bëhet profesionistëve të rinj dhe diplomatëve të karrierës».