Aktiviteti Ora e Pritjes nis numërimin mbrapsht në Deçan
Në Deçan ka filluar numërimi mbrapsht drejt 16 shtatorit në mbështetje të ish-krerëve të UÇK-së, ku u shpalos baneri me mesazhin e pafajësisë.
Redaksia ZHURMA · · 1 min lexim
Në bashkëpunim me Komunën e Deçanit dhe platformën qytetare «Liria Ka Emër», ka filluar aktiviteti i njohur si «Ora e Pritjes». Ngjarja shënon numërimin mbrapsht drejt datës 16 shtator, duke u bërë thirrje për drejtësi dhe liri për ish-krerët e Ushtrisë Çlirimtare të Kosovës që po ballafaqohen me gjykimin në Hagë, Hashim Thaçi, Kadri Veseli, Jakup Krasniqi dhe Rexhep Selimi.
Pjesë e këtij organizimi ishin qytetarë të ndryshëm, aktivistë si dhe përfaqësues politikë, mes të cilëve edhe Eliza Hoxha dhe kryetari i Komunës së Deçanit, Bashkim Ramosaj. Gjatë këtij organizimi, në qytet është ekspozuar një baner madhështor me mbishkrimin «Në emër të popullit, shpalleni TË PAFAJSHËM!». Pas këtyre zhvillimeve, agjenda e «Liria Ka Emër» parasheh vazhdimin e aktiviteteve publike deri te «Marshi për Liri», i cili do të organizohet më 12 shtator në sheshin «Skënderbeu» të kryeqytetit.
