Aksident me fatalitet në Junik, vdes drejtuesi i katërçikletës

Një aksident trafiku me fatalitet ka ndodhur në fshatin Jasiq të Junikut, ku ka humbur jetën drejtuesi i një katërçiklete. Rastin e ka konfirmuar zëdhënësi i Policisë së Kosovës për rajonin e Pejës, Driton Rugova.

Sipas njoftimit të policisë, aksidenti ka ndodhur rreth orës 13:40, kur është raportuar se në të ishte përfshirë një katërçikletë. Vozitësi i saj ka ndërruar jetë në vendin e ngjarjes, çka është konstatuar nga ekipi mjekësor.

Në vendin e ngjarjes kanë dalë njësitet relevante të Policisë, si dhe prokurori i shtetit. Me urdhër të prokurorit, trupi i pajetë i viktimës është dërguar në IML-Prishtinë për obduksion.

Autoritetet kanë nisur hetimet për të zbardhur rrethanat dhe shkaqet e aksidentit.