Ahmeti: Pjesëmarrja masovike në zgjedhje forcon përfaqësimin

Kreu i Bashkimit Demokratik për Integrim, Ali Ahmeti, u ka bërë thirrje banorëve në Preshevë, Bujanoc, Medvegjë dhe vendbanimet e tjera që të marrin pjesë masivisht në zgjedhjet parlamentare në Serbi, të aštura për t'u mbajtur më 25 tetor. Përmes një postimi në platformën Facebook, ai ka theksuar se procesi zgjedhor ka rëndësi të veçantë për të drejtat kombëtare, gjuhësore dhe qytetare në parlament. «Përfaqësimi politik i shqiptarëve në Parlamentin e Serbisë ka rëndësi të veçantë për mbrojtjen e të drejtave kombëtare, gjuhësore dhe qytetare, si dhe për ngritjen e shqetësimeve lidhur me diskriminimin, padrejtësitë dhe sfidat me të cilat përballen shqiptarët në këto treva», u shpreh kreu i BDI-së, duke shtuar se forcat politike paraqiten të bashkuara në listën e përbashkët «Koalicioni Shqiptar», me numër 17.

Edhe koalicioni VLEN u ka drejtuar thirrje shqiptarëve të Luginës për mobilizim dhe përfaqësim më të madh, duke e cilësuar datën e zgjedhjeve si mundësi për të forcuar zërin e tyre. Apeli i këtij koalicioni u drejtohet veçanërisht atyre që jetojnë në Maqedoninë e Veriut, duke i ftuar të udhëtojnë drejt vendvotimeve për të ushtruar të drejtën e votës. Këto zgjedhje të parakohshme në Serbi zhvillohen në një periudhë me tensione të larta politike dhe protesta të vazhdueshme kundër qeverisë, të cilat u nxitën pas një tragjedie në Novi Sad dhe kërkesave për llogaridhënie e luftë kundër korrupsionit.