Kurti emëron Agron Limanin në krye të Komisionit për Persona të Zhdukur

PRISHTINË — Kryeministri në detyrë i Kosovës, Albin Kurti, ka emëruar Agron Limanin në pozitën e kryesuesit të Komisionit Qeveritar për Persona të Zhdukur. Limani është aktivist shumëvjeçar për zbardhjen e fatit të personave të zhdukur, është bashkautor i monografisë “Fshati i Vrarë” për masakrën e Krushës së Vogël dhe familjar i disa personave të zhdukur gjatë luftës.

Sipas njoftimit të Zyrës së Kryeministrit, Limani është aktivist i angazhuar prej më shumë se dy dekadash në kërkimin e së vërtetës dhe drejtësisë për personat e zhdukur me dhunë gjatë luftës në Kosovë. Ai ka qenë ushtar i Ushtrisë Çlirimtare të Kosovës (UÇK) dhe familja e tij është prekur rëndë nga lufta.

Ekzekutivi i Qeverisë thotë se Limani e ka nisur angazhimin e tij në kërkim të personave të zhdukur përmes drejtimit të Shoqatës për Hulumtimin e Personave të Rrëmbyer “26 Marsi 1999”. Qeveria thekson se mbetet e përkushtuar në këtë kërkim, përkundër pengesave dhe sabotimit të vazhdueshëm nga Serbia.

Qeveria vlerësoi gjithashtu se gërmimet e fundit në Kalludër të Zubin Potokut janë rezultat i punës së institucioneve të Kosovës dhe përsëriti thirrjen ndaj bashkësisë ndërkombëtare që të ushtrojë presion mbi Serbinë për zbatimin e Deklaratës së 2 majit 2023 për personat e zhdukur me dhunë.

Kërkohet edhe hapja e arkivave të forcave serbe, përfshirë arkivën e Brigadës së Motorizuar 37 të ish-Ushtrisë Jugosllave, me qëllim ndriçimin e fatit të personave të zhdukur gjatë luftës në Kosovë.

Burim: Telegrafi
— Redaksia ZHURMA