Kurti thotë se djemtë e vajzat nuk duhet të edukohen më me role dominuese e dëgjuese

Kryeministri i Kosovës, Albin Kurti, deklaroi në mbledhjen e Këshillit të Përgjithshëm të Lëvizjes Vetëvendosje se shoqëria nuk mund të vazhdojë t'i edukojë vajzat që të jenë të dëgjueshme e të durueshme dhe djemtë të jenë dominues. Deklarata e tij erdhi gjatë diskutimit për vrasjen e Arlindës dhe nevojën për ndryshimin e mendësisë patriarkale në vend.

Ngjarja e rëndë ka nxitur reagime mbi pozitën e gruas në shoqëri dhe mënyrën se si trajtohen marrëdhëniet gjinore. Sipas kryeministrit Kurti, mendësia ekzistuese vazhdon ta shohë gruan si pronë ose objekt, ku pavarësia e saj perceptohet si mosbindje dhe largimi nga një marrëdhënie interpretohet si cenim i autoritetit mashkullor.

Ai tha se ky problem nuk mund të zgjidhet vetëm përmes ndryshimeve ligjore, por kërkon një përballje të vazhdueshme në familje, shkolla, institucione publike dhe brenda vetë subjekteve politike. Për këtë arsye, ai theksoi rëndësinë e ndërhyrjes që në moshë të hershme për të transformuar rolet tradicionale gjinore.

Qeveria planifikon të ndërmarrë rishikimin e kurrikulave arsimore, duke filluar nga edukimi parashkollor e deri në të gjitha nivelet e tjera të arsimit. Kurti sqaroi se synimi i këtij hapi është që barazia, respekti për tjetrin, autonomia personale dhe zgjidhja e konflikteve pa dhunë të mësohen që në fëmijëri në mënyrë të përshtatshme për secilën moshë.

«Vrasja e Arlindës na përballi edhe me një problem më të thellë, me një mendësi patriarkale e cila ende e konsideron gruan si pronë, apo objekt mbi të cilin burri mund të ushtrojë forcë, që pavarësinë e saj e sheh si mosbindje dhe vendimin për t'u larguar nga një marrëdhënie si cenim të autoritetit mashkullor», u shpreh ai gjatë fjalës së tij.