Pse ndau qeveria 2 milionë euro për linjat ajrore dy javë para zgjedhjeve?

PRISHTINË — Qeveria në detyrë e Kosovës vendosi më 26 maj të ndajë 2 milionë euro për subvencionimin e linjave ajrore që operojnë në destinacione të lidhura me diasporën, në kuadër të masës "Mbështetja e Mërgatës".

Kryeministri në detyrë, Albin Kurti, tha se vendimi u mor "përballë rrezikut që një pjesë e fluturimeve të planifikuara gjatë muajve korrik dhe gusht të anulohen për shkak të rritjes së kostos së karburantit". Në një postim në Facebook më 27 maj, Kurti argumentoi se anulimi i fluturimeve "do të ishte fatale edhe për ekonominë e vendit".

Partitë opozitare dhe shoqëria civile e kritikuan vendimin si tentim për ndikim te votuesit nga diaspora. Instituti Demokratik i Kosovës (KDI) e cilësoi masën si "ndërhyrje me motive elektorale". Hulumtuesi i KDI-së, Eugen Cakolli, shkroi më 26 maj se kjo "po e shndërron garën zgjedhore në një proces krejtësisht të pabarabartë".

Kurti iu kundërpërgjigj duke thënë se masa do të ndikojë "të gjithë muajt e verës", jo periudhën zgjedhore. "Nuk bëhet fjalë për blerje biletash apo ardhje të organizuar për zgjedhje", shkroi ai.

Sipas ministrit në detyrë të Financave, Hekuran Murati, kompanitë do të përfitojnë 3 euro për pasagjer në sezonin veror, nëse ruajnë frekuencën e fluturimeve për mbi 85 për qind të planit 2026 dhe mbushin mbi 80 për qind të karrigeve. Qeveria do të paguajë 2.10 euro, ndërsa Aeroporti i Prishtinës pjesën tjetër.

Deri tani asnjë kompani ajrore nuk ka konfirmuar nëse do të aplikojë. Edelweiss i tha Radio Evropa e Lirë se "ende nuk është njoftuar", ndërsa Chair Airlines refuzoi të komentojë. GP Aviation, që pati rreth 1.4 milionë udhëtarë në Prishtinë në 2025 sipas AAC-së, nuk iu përgjigj pyetjeve.

Burim: Lajmi.net
— Redaksia ZHURMA