14 vatra zjarri shpërthejnë në 12 orë në Shqipëri, 5 ende aktive
182 forca, 19 automjete, 3 helikopterë dhe 1 avion luftërojnë flakët në disa zona problematike të vendit.
TIRANË — Në 12 orët e fundit janë raportuar 14 vatra zjarri në Shqipëri, prej të cilave 5 mbeten ende aktive, sipas njoftimit zyrtar të strukturave të emergjencave. Për izolimin dhe shuarjen e flakëve janë angazhuar 182 forca operacionale, 19 automjete zjarrfikëse, 3 helikopterë dhe 1 avion i Forcës Ajrore.
Ndërhyrjet janë përqendruar në zonat e Dajtit, Riban në Mallakastër, Shqiponjën në Prrenjas, Vërzhezhën në Skrapar, Krekëzin në Himarë, si dhe zonën malore mes Stegopullit dhe Selckës në bashkite Libohovë dhe Dropull. Në Riban, falë ndërhyrjes së forcave nga toka dhe ajri, është eliminuar rreziku për zonat e banuara, ndërsa 15 familje u evakuuan përkohësisht si masë parandaluese.
Nga vatrat e shuara janë prekur rreth 1.5 hektar sipërfaqe me barishte, shkurre dhe bimësi pyjore, ndërsa dëmet nga vatrat aktive vijojnë të jenë në proces vlerësimi. Strukturat e mbrojtjes civile vijojnë monitorimin dhe koordinimin e operacioneve në të gjithë territorin.
Burim: Gazeta Metro
— Redaksia ZHURMA
