Komuna e Dragashit kërkon që mjedisi të mos përdoret për propagandë

Komuna e Dragashit ka reaguar ndaj akuzave rreth ndërtimit të një deponie të mbetjeve inerte ndërmjet fshatrave Vranisht dhe Orçushë. Sipas komunës, kjo çështje nuk duhet të shndërrohet në objekt të propagandës politike apo të ndasive etnike. Institucioni sqaroi se bëhet fjalë për një deponi të kontrolluar për mbetje nga gërmimet, rrënimet dhe ndërtimet, e paraparë përmes Grantit të Performancës me dy lokacione të planifikuara për Gorën dhe Opojën, me qëllim parandalimin e ndotjes dhe eliminimin e deponive ilegale. Po ashtu, u theksua se të gjitha partitë e koalicionit kanë qenë të njoftuara në Bordin e Drejtorëve për dymbëdhjetë projektet e këtij granti, ndërsa u bë thirrje që shqetësimet të trajtohen mbi bazën e dokumentacionit dhe informatave zyrtare.