Drake shfaqet sërish me shqiponjën dykrenare në videoklipin e ri

Këngëtari kanadez Drake ka befasuar sërish me një paraqitje ku vë në pah simbolin kombëtar shqiptar, duke u shfaqur me një qafore të artë me shqiponjën dykrenare në këngën e tij më të re të titulluar «Ya Hit». Sipas mediave, në këtë projekt muzikor artistik, ai vjen në një bashkëpunim me reperët e njohur Future dhe Travis Scott, ndërsa në videoklipin e publikuar së fundmi aksesori i madh dhe i artë bie dukshëm në sy.

Në projektet e mëparshme, sipas raporteve të mediave, artisti kanadez ishte paraqitur i veshur me një xhaketë të kuqe, në pjesën e pasme të së cilës ishte e vendosur shqiponja dykrenare. Këngëtari krahas kësaj është parë shpesh edhe me bluza, xhaketa dhe kapele me ngjyrat kuqezi, duke treguar simpatinë e tij për simbolet kombëtare shqiptare në raste të ndryshme.

Sipas portaleve, në videoklipin e ri krahas elementeve të tjera, ajo që ka tërhequr vëmendje është varësja e reperit Drake, ku ai mban në qafë një zinxhir gjigant floriri të mbuluar me diamante të shqiponjës dykrenare të flamurit shqiptar, teksa në klip marrin pjesë edhe zëra të tjerë të famshëm të muzikës rap si Loe Shimmy.

Ndërkohë, nuk dihet ende arsyeja e saktë pse këngëtari zgjedh të shfaqet me simbole shqiptare në paraqitjet e tij. Megjithatë, paraqitjet e tilla të artistit botëror janë pritur me një entuziazëm të madh dhe janë vlerësuar nga fansat e tij shqiptarë kudo në botë.

Drake vazhdon të mbetet një nga emrat më të njohur të muzikës botërore, i cili numëron një karrierë jashtëzakonisht të suksesshme me hite të shumta ndërkombëtare që prej vitesh dëgjohen dhe pëlqehen në mbarë botën nga miliona dëgjues.