Çfarë mangësitë e KEK-ut zbuloi auditimi i ZKA-së?

PRISHTINË — Korporata Energjetike e Kosovës (KEK) ka marrë opinion të kualifikuar për pasqyrat financiare të vitit 2025, pasi Zyra Kombëtare e Auditimit (ZKA) zbuloi mangësi të rënda në menaxhimin e pasurisë, kontrollin e brendshëm dhe procedurat e prokurimit.

Auditori vlerëson se opinioni i kualifikuar rrjedh nga tre çështje kryesore: mos-përditësimi i regjistrit të pasurisë së paluajtshme, prezantimi i pasigurt i pasurive afatgjata dhe trajtimi i pamjaftueshëm i rezultateve të inventarizimit vjetor.

Në regjistrat e KEK-ut vazhdojnë të figurojnë prona që nuk i përkasin ndërmarrjes, përfshirë pesë prona të transferuara te Infrakos me vlerë 7.9 milionë euro, 11 parcela me vlerë mbi 866 mijë euro dhe pronën "Mali i pyllëzuar" në Podujevë, me vlerë 5 milionë euro, e cila i përket Agjencisë së Pyjeve të Kosovës.

Gjithashtu, 472 pasuri me vlerë neto kontabël prej 7.7 milionë euro nuk trajtohen sipas modelit të përcaktuar, ndërsa 69% e pasurive të regjistruara, me vlerë fillestare 229 milionë euro, rezultojnë të zhvlerësuara, megjithëse vazhdojnë të përdoren në veprimtarinë e ndërmarrjes.

ZKA ka gjetur edhe moszbatim në 32 kontrata të furnizimit me konsumatorë komercialë, ku KEK-u nuk ka aplikuar garancion bankar ose parapagim, siç parashikohej në kushtet kontraktuale. Kjo e ekspozon ndërmarrjen ndaj rrezikut të mosarkëtimit të faturave dhe humbjeve financiare.

Auditimi zbuloi gjithashtu dobësi në kontrollin e brendshëm të procesit të ankandeve për tregtimin e energjisë, ku përdoret një platformë e vjetruar elektronike (Microsoft Exchange Server 2010) pa gjurmë të auditimit dhe pa përditësime të sigurisë. Raporti përmban 12 rekomandime, gjashtë prej të cilave janë të reja, për përmirësimin e raportimit financiar dhe pajtueshmërisë me legjislacionin.

Burim: Telegrafi
— Redaksia ZHURMA