ZKA nxjerr në shesh 54 vonesa dhe 16 mijë euro pasaktësi në OSHP

PRISHTINË — Zyra Kombëtare e Auditimit (ZKA) ka dhënë opinion të kualifikuar për pasqyrat financiare të Organit Shqyrtues të Prokurimit (OSHP) për vitin 2025, duke evidentuar parregullsi financiare dhe operative që bien ndesh me funksionin e këtij institucioni.

Të hyrat e OSHP-së ranë për 26 për qind — nga 555,974 euro në 2024-n në 407,264 euro në 2025-ën. Rënia e të ardhurave paralelisht me gjetjet e rënda të auditimit ngre pyetje për qëndrueshmërinë e institucionit që duhet të garantojë transparencë në prokurimin publik.

Auditimi zbuloi pasaktësi prej 16,308 euro në regjistrimin e të hyrave nga depozitat e konfiskuara. 4,332 euro u dërguan dy herë në Thesar, ndërsa 1,330 euro u regjistruan gabimisht si 13,306 euro. ZKA e lidh këtë me mungesën e kontrolleve efektive në verifikim.

Në 13 raste, tarifat e ankesave u paguan më pak sesa parashikohen me rregullore — 4,864 euro të papaguara sipas normave ligjore. Kjo nënvlerësim i të hyrave vjen nga zbatimi jo i njëtrajtshëm dhe mungesa e kontrollit gjatë verifikimit të pagesave.

Vonesat më të rënda goditen pikërisht në thelbin e misionit të OSHP-së: 12 ekspertë shqyrtues vonuan raportet për 1-26 ditë, ndërsa paneli shqyrtues zvarriti 54 vendime për 1-91 ditë përtej afateve ligjore. Auditorët vlerësojnë se këto vonesa cenojnë transparencën dhe llogaridhënie në prokurimin publik, ndikojnë në projektet publike dhe rrezikojnë besimin e operatorëve ekonomikë.

Problemet shtrihen edhe në menaxhimin e personelit dhe pasurisë. Tre ekspertë ushtronin detyrën pa akte emërimi të nënshkruara, krijonin paqartësi ligjore. Pasuri prej 939 eurosh dhe materiale 2,704 eurosh mungonin në sistemin "e-Pasuria". Tetë fatura 7,988 eurosh mbetën të papaguara përtej afatit 30-ditor, deri në tre muaj vonesë.

Regjistrimi i depozitave të konfiskuara u bë me vonesa 3-257 ditë nga vendimi përfundimtar. Për një organ që duhet të shqyrtojë ankesat ndaj institucioneve publike, gjetjet e ZKA-së flasin për një institucion që vështirë mund të kontrollojë të tjerët kur nuk kontrollon vetveten.

Burim: Lajmi.net
— Redaksia ZHURMA