Rama: Pa normalizim me Kosovën, Serbia mbetet peng i së kaluarës

Gjatë një bashkëbisedimi në Dublin të Irlandës, organizuar nga Instituti i Çështjeve Ndërkombëtare dhe Europiane (IIEA), kryeministri i Shqipërisë, Edi Rama, ka deklaruar se është ende herët për të pasur entuziazëm lidhur me zhvillimet e fundit politike në Serbi dhe ndikimin e tyre në integrimin evropian të Ballkanit Perëndimor. Sipas tij, Komisioni Evropian ka pasur problematika me administratën e mëparshme serbe, veçanërisht në sundimin e ligjit dhe përmbushjen e kritereve themelore. «Është shumë herët për të thënë diçka me saktësi për atë që vjen më pas», u shpreh ai para diplomatëve dhe ekspertëve.

Kreu i Qeverisë shqiptare i ka cilësuar ndryshimet e brendshme politike atje si një eksperiment social dhe politik, duke përmendur të ashtuquajturën «Listë Studentore» dhe metodën e përzgjedhjes së kandidatëve për parlament apo qeveri, ndërsa theksoi se mbetet për t'u parë çfarë rezultatesh do të prodhojë kjo qasje e re. Nga këndvështrimi i Shqipërisë, BE-ja dhe rajoni kërkojnë qartësi, ndërsa pa një qasje të hapur të Beogradit ndaj Kosovës, mungon progresi i qëndrueshëm. «Për aq kohë sa nuk ka një qasje të hapur kundrejt Kosovës dhe normalizimit me të, kjo do të thotë që fantazma e së shkuarës do ta përndjekë Beogradin», deklaroi Rama, duke shtuar se kjo pengon kombin serb të kryejë katarsisin e nevojshëm.