Zjarr në Shqipëri: Pesë vatra mbeten aktive, evakuohen katër familje në Mallakastër
Ministria e Mbrojtjes raporton për 34.5 hektarë të djegur dhe evakuimin e katër familjeve në zonën e Mallakastrës.
TIRANË — Ministria e Mbrojtjes ka njoftuar se gjatë 24 orëve të fundit në të gjithë vendin janë regjistruar 28 vatra zjarri. Prej tyre, pesë vatra vijojnë të jenë ende aktive, ndërsa pjesa tjetër e flakëve është shuar ose izoluar nga forcat në terren. Sipas bilancit zyrtar, zjarret kanë përfshirë rreth 34.5 hektarë sipërfaqe me barishte, shkurre, pisha dhe pyll të përzier.
Në operacionet masive për shuarjen e flakëve janë angazhuar gjithsej 631 forca operacionale, 64 automjete zjarrfikëse dhe 90 efektivë të Forcave të Armatosura. Përveç ndërhyrjes nga toka, në shuarje po ndihmojnë tre helikopterë dhe një avion zjarrfikës. Në Dajt po ndërhyhet nga toka dhe ajri pa rrezik për banesat, ndërsa në Mallakastër situata po shkon drejt stabilizimit, ndonëse për siguri janë evakuuar katër familje.
Ndërkohë, vatrat në Elbasan, Berat, Dibër dhe Gjirokastër janë vënë nën kontroll ose janë shuar plotësisht, por po vijon monitorimi për të shmangur riaktivizimin e mundshëm të tyre. Autoritetet shtetërore mbeten në terren për izolimin e plotë të vatrave active që po kërcënojnë sipërfaqet pyjore.
Burim: Report Tv
— Redaksia ZHURMA