Ziber dhe Fatime Memeti pastrojnë çdo ditë mbeturinat në banjën e Tetovës
Një çift pensionistësh nga Tetova dalin çdo mëngjes në këmbë për të mbledhur mbeturinat dhe për t'i kthyer pastërtinë zonës.
Redaksia ZHURMA · · 1 min lexim
TETOVË — Çdo ditë në orën 06:30 të mëngjesit, Ziber dhe Fatime Memeti vijnë te banja e Tetovës për të pastruar mbeturinat e lëna nga vizitorët. Ndonëse Ziberi është 75 vjeç, ai dhe bashkëshortja e tij e bëjnë këtë rrugë në këmbë prej më shumë se një muaji, duke mbledhur plastika dhe qese çdo ditë deri në orën 10:00.
Ziber Memeti tregon se ka nisur të pastrojë rregullisht zonën pasi i pengon papastërtia dhe sjellja e njerëzve. «Kam një muaj që unë rregullisht me shoqen pastroj, pasi më pengon… nuk e di pse, më vjen inat pse ne kështu të jemi», tha ai, duke shtuar se mbledh mbeturina nga kasha deri te mulliri dhe nga hidrocentrali. Nga ana e saj, Fatime Memeti tregon se pas 34 vjetësh pune në Zvicër, tashmë janë pensionistë dhe këtë e shohin si obligim moral ndaj vendit ku u rritën. «Dalim ecim për shëndetin tonë, kemi dalë burrë e grua çdo ditë aktivë», u shpreh ajo, duke shtuar se pas shtimit të mbeturinave nga turistët dhe mërgimtarët gjatë verës, morën nismën për t'i pastruar ato.
