Zejnulla bëhet ministër pa resor, koalicioni i Mickoskit kalon në 59 deputetë

SHKUP — Kuvendi i Maqedonisë së Veriut miratoi sot rikonstruimin përfundimtar të Qeverisë, duke zgjedhur Zylfiqar Zejnullën, kryetar i Partisë Demokratike të Turqve, si ministër pa resor. Zgjedhja erdhi pas marrëveshjes së koalicionit mes partisë së tij dhe VMRO-DPMNE-së, ndërsa me të njëjtin rast deputeti Bejxhan Iljas, i zgjedhur nga lista e Frontit Evropian të udhëhequr nga BDI, iu bashkua shumicës qeverisëse.

Me këtë hap, koalicioni i udhëhequr nga VMRO-DPMNE arriti 59 deputetë, pa i llogaritur deputetët e partnerëve të koalicionit, VLEN dhe ZNAM. Zgjedhja e Zejnullës u nda nga paketa e mëparshme, pasi përfshirja e tij në të njëjtin votim do ta kishte tejkaluar kufirin kushtetues për ndryshimin e më shumë se një të tretës së ministrave.

Kryeministri Hristijan Mickoski kërkoi mbështetjen e deputetëve, duke thënë se institucionet duhet të drejtohen nga njerëz me përgjegjësi dhe kapacitet. "Nevojitet një politikë që bashkon, e jo që krijon hendekë të rinj," deklaroi ai. Opozita vlerësoi se vendimtare duhet të jenë cilësitë dhe vizioni i kandidatit, jo përkatësia etnike, duke shtuar se zgjedhja është rezultat i marrëveshjeve politike.

Sipas biografisë së tij, Zejnulla ka qenë zëvendësdrejtor i Drejtorisë për Mbrojtje dhe Shpëtim nga 2021 deri 2024 dhe këshilltar në Komunën e Gostivarit. Ai është diplomuar në kriminalistikë në Universitetin "Shën Klimenti i Ohrit" në Manastir dhe flet, përveç turqishtes, edhe maqedonisht, shqip, gjermanisht e serbisht.

Burim: TV21
— Redaksia ZHURMA