Zbulohen 180 mijë breshka gjigante në Seychelles

Një studim i ri ka zbuluar se rreth 180 mijë breshka gjigante të Aldabrës jetojnë në gjendje të egër në atollin me të njëjtin emër në arkipelagun e Seychelles. Ky shënon numrin më të lartë të regjistruar ndonjëherë për këtë specie, e cila në të kaluarën ka qenë e rrezikuar.

Sipas mediave, përfundimi vjen nga një studim i përbashkët i Fondacionit të Ishujve të Seychelles dhe Universitetit të Exeterit, i bazuar në të dhënat e mbledhura nga viti 2018 deri më 2022. Shifra e re zëvendëson vlerësimin e mëparshëm prej rreth 100 mijë breshkash, të raportuar në fund të viteve 1990, dhe e tejkalon dukshëm popullsinë njerëzore të Seychelles.

Atolli Aldabra mbetet një nga vetëm dy vendet në botë ku këto breshka gjigante jetojnë të lira në natyrë, krahas ishujve Galapagos ku popullata është dukshëm më e vogël. Drejtoresha ekzekutive e Fondacionit të Ishujve të Seychelles, Frauke Fleischer-Dogley, u shpreh se prania e këtyre breshkave dëshmon rëndësinë e përpjekjeve afatgjata për mbrojtjen e natyrës. «Ky është një lajm i mrekullueshëm për Seychelles, për botën dhe për të gjithë ata që kanë punuar për mbrojtjen e Aldabrës», deklaroi ajo.