Mbetje eshtërore gjenden në varrezat e fshatit Shipol në Mitrovicë

MITROVICË — Mbetje eshtërore që dyshohet se i përkasin një viktime të luftës janë zbuluar në varrezat e fshatit Shipol, në kuadër të përpjekjeve për zbardhjen e fatit të personave të zhdukur nga konflikti i viteve 1998-1999. Veprimet në terren janë ndërmarrë nga Sektori për Hetimin e Personave të Zhdukur Gjatë Luftës, në bashkëpunim me Komisionin Qeveritar për Persona të Zhdukur dhe Institutin e Mjekësisë Ligjore, në zbatim të një urdhërese të lëshuar nga Departamenti Special i Gjykatës Themelore në Prishtinë për çështje të zhvarrosjes, autopsisë dhe identifikimit. Gjatë këtij operacioni, autoritetet kanë hasur në mbetje të një personi të gjinisë mashkullore dhe të nacionalitetit kosovar. Ato janë marrë nga vendi i ngjarjes për t'u përcjellë në Institutin e Mjekësisë Ligjore ku do të kryhen analizat e nevojshme për përcaktimin e identitetit.