Zbardhen kushtet e Moskës për paqen në Ukrainë
Një dokument i zbardhur tregon kërkesat e Rusisë për sigurinë evropiane dhe marrëveshjen me Ukrainën.
Redaksia ZHURMA · · 1 min lexim
Rusia kërkon ndryshime të thella në arkitekturën e sigurisë evropiane si kusht për arritjen e një marrëveshjeje paqeje me Ukrainën. Sipas një dokumenti të datës 10 nëntor të siguruar nga gazeta amerikane «The New York Times», Moska kërkon që Britania e Madhe dhe Franca të heqin dorë nga angazhimi për të mbrojtur me armë bërthamore aleatët e tyre evropianë. Kërkesat e negociatorëve rusë parashikojnë gjithashtu që forcat e NATO-s të tërhiqen në pozicionet që mbanin në vitin 1997, para zgjerimit drejt Evropës Lindore dhe shteteve baltike.
Dokumenti përfshin ndërprerjen e ndihmës ushtarake perëndimore dhe heqjen dorë të Kievit nga anëtarësimi në NATO, ndërsa pranon mundësinë e anëtarësimit në Bashkimin Evropian me kusht që vendi të qëndrojë jashtë marrëveshjeve të përbashkëta të mbrojtjes. Këto kushte rikthejnë kërkesat e paraqitura në dhjetor 2021, ndërkohë që bisedimet diplomatike janë zhvilluar në Abu Dhabi në fillim të këtij muaji mes përfaqësuesve të Rusisë, Ukrainës dhe Shteteve të Bashkuara.
