Vulin dyshohet se tentoi të arratisej, avioni drejt Moskës kthehet në Beograd

Një fluturim i kompanisë Air Serbia drejt Moskës u detyrua të kthehej në aeroportin «Nikola Tesla» të Beogradit, në rrethana që nuk janë sqaruar zyrtarisht, sipas raporteve të mediave. Avioni i tipit Airbus A320 me numër fluturimi JU134 ishte nisur nga Beogradi në orën 18:25, ndërsa sipas portalit Shekulli ishte ngritur në orën 18:48 dhe kishte arritur deri në jug të Lituanisë përpara se të merrte urdhër kthimi, duke u ulur në kryeqytetin serb pak para orës 22:00.

Kjo ngjarje e pazakontë ka nxitur valë spekulimesh në opinionin serb për shkak të pasagjerëve të përfolur në bord. Sipas burimeve të mediave, në avion dyshohet se ndodheshin Aleksandar Vulin, drejtori i Srbijagas-it, Dušan Bajatović, dhe politikani Nenad Popović. Televizioni N1 raportoi se urdhri për kthimin e avionit u dha nga drejtori i sigurisë korporative të aeroportit për motive sigurie, ndërsa gazeta Republika ka ngritur dyshime për keqpërdorime financiare prej rreth 60 milionë eurosh në një institucion të Vojvodinës, çështje që e ka lidhur me emrin e Vulinit, megjithëse pa konfirmim zyrtar.

Disa orë para nisjes, kryetari i Partisë Demokratike të Serbisë, Srđan Milivojević, kishte paralajmëruar publikisht në rrjetin social X një fluturim të mundshëm drejt Moskës. Më herët, në një prononcim për Naš Portal, ai kishte pretenduar se dy zyrtarë po udhëtonin drejt Rusisë dhe se njëri prej tyre kishte prerë biletë vetëm vajtje, duke deklaruar se kishte filluar një hetim. Sipas portalit ETV, dy politikanët e synuar ishin Aleksandar Vulin dhe Nenad Popović. Portali Shekulli shtoi se Vulin do të zhvillonte takime për aktivitetin e Srbijagas-it, ku mban postin e kryetarit të Bordit Mbikëqyrës që nga maji 2025, ndërsa Popović do të udhëtonte për konsultime rreth Komitetit të Përbashkët Ndërqeveritar Serbo-Rus.

Televizioni N1 bëri të ditur se ka kërkuar sqarime nga Air Serbia, aeroporti «Nikola Tesla» dhe Drejtoria e Aviacionit Civil, por nuk ka marrë përgjigje, ndërsa kontaktet me Vulinin dhe Bajatovićin kanë rezultuar të pasuksesshme. Deri më tani, autoritetet nuk kanë konfirmuar zyrtarisht praninë e tyre në avion apo arsyet e vërteta të ndërprerjes së fluturimit.