BE ndërmjetëson mes Kroacisë dhe Malit të Zi për zgjerimin

Krerët e Bashkimit Evropian, Antonio Costa dhe Ursula Von der Leyen, kanë zhvilluar bisedime me kryeministrin kroat Andrej Plenković në margjinat e samitit informal të BE-së në Dublin. Udhëheqësit evropianë shprehën mirëkuptim për qëndrimet e Kroacisë, por dolën kundër përdorimit të vetos për çështjet dypalëshe, duke theksuar se mosmarrëveshjet e hapura nuk duhet të ndalin procesin e zgjerimit.

Plenković u shpreh se pret përparim nga autoritetet malazeze për vlerat evropiane dhe fqinjësinë e mirë brenda Kapitujve 23 dhe 31, duke shtuar se vullneti politik i Podgoricës është çelësi për miratimin e tyre në Bruksel. Në muajin tetor, Kroacia i kishte paraqitur një listë me tetë kushte Malit të Zi, prej të cilave dy janë zgjidhur dhe gjashtë mbeten të hapura, duke përfshirë çështjet e kufirit, anijen shkollore “Jadran”, personat e zhdukur, kompensimet, krimet e luftës dhe të drejtat pronësore.

Mali i Zi deri më tani ka mbyllur përkohësisht 23 kapituj negociues dhe synon t'i përfundojë negociatat deri në fund të vitit 2026, megjithëse mbyllja e çdo kapitulli kërkon pëlqimin unanim të të gjitha shteteve anëtare të Bashkimit Evropian.