Ymeri: Në KEK u punësuan 777 persona, punëtorët e rinj janë bossa

Deputetja e Lidhjes Demokratike të Kosovës, Janina Ymeri, ka adresuar akuza publike ndaj menaxhimit të Korporatës Energjetike të Kosovës, duke bërë të ditur se gjatë vitit 2025 janë punësuar 777 punëtorë të rinj. Ajo ka vënë në pikëpyetje procesin e rekrutimit, duke e cilësuar si llotari politike që sipas saj ka ndikuar në rezultatet zgjedhore në Obiliq dhe Fushë Kosovë.

Sipas deputetes, stafi i vjetër është ankuar se sektori i prodhimit vuan nga mungesa e personelit aktiv pavarësisht hyrjes së fuqisë punëtore të re. «Nuk kemi punëtorë në prodhim, sepse punëtorët e pranuar nga Vetëvendosja nuk punojnë, janë bossa», ka cituar Ymeri ankesat e pranuara nga punëtorët. Për më tepër, ajo ka përmendur vdekjen e katër personave brenda ndërmarrjes gjatë këtij viti, grevat e zhvilluara nga stafi dhe ka ngritur shqetësime për shfrytëzimin e taksave të qytetarëve, duke pyetur në fund: «Nuk është kjo shembje e shtetit dhe pirje e djersës së punëtorit?!».